Apo Lah Ko (MinangKabau)

Lah lamo sabananyo tapikia dibanak ko untuak mancubo buek tulisan di Blog iko jo bahaso Minang nan di cinto. Pi baa lah, lai ka ado urang lain nan ka mambaconyo beko salain urang Minang jo nan mangarati jo bahaso Minang / Padang saketek saketek. Mungkin ikolah tulisan partamo di Blog awak nan babahaso Minang, sabananyo ndak lo tau apo nan ka dibuek siap iko tapi dicubo juo untuak manaruihannyo supayo ado jo hubungannyo saketek samo deskripsi blog awak “Minang Bloggers“.

Apo lai yo ??? O yo ancaknyo ditulisan partamo bahaso Minang ko, awak mulai dari maagiah tau namo asli awak nan dunsanak lain alun tau, sabab salamo ko awak mamakai namo lain di dunia maya ko (JhezeR) namo gala nan banyak artinyo bagi awak. Namo asli awak nan diagiah urang gaek tacinto jo tasayang dunia jo akhirek yo banamo Jerry Asta Gemini, tu kawan kawan sapamainan acok manggia awak jo Jerry sajo.

Kiniko masih manuntuik ilmu satinggi langik (kecek urang saisuak) di Fakultas Teknik Universitas Andalas, Padang. Masih Puta-puta paniang jo samo palajaran lai, bia kini alah taun gaek . Baarok bana sagalo urusan kuliah sadonyo capek salasai di taun iko, bia dipikian lo urusan nan lain bantuak cari karajo / buek karajo surang, dapek manyanangan hati kaluargo sadoalanyo tu dapek bini ancak jo kamek lai, siap tu mati masuak surgo (sanang nyo ati kalau bantuak itu) hohoho…. Mulai suko jo dunia maya ko sajak SMP kelas tigo, maklum di nagari awak Batusangka wakatu tu baru masuak nan namonyo internet ditambah lo harago nan salangik padohal koneksinyo bantuak cipuik sadang paniang jadinyo hanyo sakali sakali awak pai ka warnet dibueknyo.

Kiniko sadonyo alah maju ditambah lo harago alah murah / jatuah tapai, urang urang dari nan ketek sampai gaek alah pandai lo bukak komputer jo internet untuk mancaliak barito nan katuju dek nyo, tu lah pandai lo bukak situs nan kecek urang banamo pesbuk jo twitter nan kini sadang angek angeknyo, ntah apo nan lamak balamo lamo mamikian kato “apo nan tapikia kini” atau “sadang manga kini” abih tu galak galak surang se bantuak urang senewen baco baleh statusnyo. Yo bana cadiak urang baraik tu mambuek urang lain kacanduan bantuak dicucuak iduangnyo bantuak kabau di sawah, tamasuak awak lo sabananyo tu

Salamo baguru jo komputer, kini awak alah pandai saketek banyak jo nan sagalo hal manganai internet jo kotak ajaib banamo komputer tu, alah dicubo lo sagalonyo mulai dari nan paliang mudah sampai ka nan sulik. Saindaknyo karajo buek Blog ikolah nan sadang katuju kini, buek Blog salain hobi bisa juo mambagi ilmu jo pamikian awak ka urang lain, yo baitu ndak dunsanak sadonyo ?

Mungkin itu se lah dulu tulisan partamo awak jo bahaso Minang manganai diri jo panilaian awak, beko kalau lamo lamo sapanjang tali baruak lo tulisan iko karano hanyo mancaritoan diri awak nan ndak paralu ko jo nan ndak abih abih sajarahnyo (apo lah ko ha). Bisuak bisuak ko awak cubo lo jo tulisan nan lain manganai saluik baluik Minang, jan lupo di baco ndak dunsanak.

Tarimo kasih jikok ado nan mambaco tulisan iko, kalau ndak ngarati dapek juo mamakai Gugel translet untuk bahaso Minang (nan alun ado) hohoho….Kok ado salah jo jangga samo kato kato awak jo bahaso Minang nan sakalamak dek ati awak, yo patuik dimaafkan bia awak pelok di kamudian hari.

Kalau ado sumua di ladang, buliah lah manumpang mandi

Kalau ado umua panjang, buliah dilanjuikkan ka tulisan ciek lai

[ baraja taruih ] [ babagi taruih ]

Salam dari Awak,

[ JhezeR ]

JhezeR

Blogger | Pencari Ilmu | Internet Maniak | Pemburu Kesuk$e$an | Penikmat Musik & Pertandingan

14 Komentar "Apo Lah Ko (MinangKabau)"